२०८० वैशाख ०८,
काठमाडौँ।
काठमाडौको पर्यटकीय नगरी बूढानीलकण्ठ नगरपालिकाले विद्यालयबाटै पाठ्यपुस्तक तथा पोशाक खरिद गर्न बाध्य नपार्न संस्थागत विद्यालयहरूलाई एक परिपत्र मार्फत सुसुचित गराएको छ । नगरपालिका अन्तर्गतको शिक्षा, युवा तथा खेलकुद महाशाखाले संस्थागत विद्यालयहरूलाई संस्थागत विद्यालय मापदण्ड तथा सञ्चालन निर्देशिका २०६९ ( संशोधन सहित ) मा व्यवस्था भए अनुसार विद्यालय -हरू आफैँले पाठ्यपुस्तक तथा स्टेशनरी बिक्री गर्न नपाउने, विद्यालयबाट निर्धारित ड्रेस कोडको नमुना विद्यार्थीहरूलाई उपलब्ध गराउनुपर्ने र विद्यालयले तोकेको स्थानमा पोशाक खरिद गर्न विद्यार्थीहरूलाई बाध्य नगराउने भन्ने व्यवस्था स्मरण गराएको हो ।
प्राय: जसो विद्यालयहरूले विद्यार्थी तथा अभिभावकहरुलाई विद्यालय -बाट नै पाठ्यपुस्तक स्टेशनरी तथा पोशाक खरिद गर्न बाध्य पार्ने गरेको गुनासो बारम्बार आउने गरेको भन्दै सम्बन्धित सबै विद्यालयहरुले अनिवार्य रूपमा निर्देशिका बमोजिम पाठ्यपुस्तक, स्टेशनरी तथा पोषाक खरिदको व्यवस्था गर्नु हुन र वार्षिक परीक्षाको नतिजाको दिन पाठ्य पुस्तक र स्टेसनरीको लिष्ट सम्बन्धित अभिभावक र यस नगरपालिकाको शिक्षा महाशाखामा उपलब्ध गराउनु हुन नगर प्रमुख मिठाराम अधिकारीले निर्देशन दिनुभएको छ ।
यदि निर्देशन कार्यन्वयन नगर्ने विद्यालयलाई कानुन बमोजिम आवश्यक कारवाही गरिने र सो को जबाफदेही सम्बन्धीत विद्यालय नै हुनु पर्ने महाशाखाले जारी गरेको परिपत्रमा जनाएको छ ।यस सम्बन्धमा पुस्तक तथा स्टेशनरी व्यवसायी संघले नगरपालिकालाई लिखित निवेदन दिँदै विद्यालयहरु पठन-पाठनमा मात्र केन्द्रित रहनुपर्ने र पुस्तक,कापि कलम जस्ता स्टेसनरीका सामाग्री बिक्रि-वितरण व्यवसाय रोक्नुपर्ने माग गरेका छन् ।
नगरपालिकाले २०७९ चैत्र २० गते उक्त विषयमा परिपत्र जारी गर्दै सम्पुर्ण संस्थागत विद्यालयलाई सुचिकृत गरेको थियो । यही परिपत्र अनुसार कतिपय विद्यालयहरुले निर्देशन पालना नगरेको भन्दै विभिन्न गुनासो परेका आधारमा शिक्षा महाशाखा प्रमुख ललित विक्रम सिंहको नेतृत्वमा ४ सदस्यीय अनुगमन समिति गठन गरिएको छ । साथै उक्त समितिबाट नियमित अनुगमन भईरहेको महाशाखा प्रमुख ललित विक्रम सिंहले जानकारी दिनुभयो ।
