कोसी प्रदेश नामाकरणको बिरोधमा झडप : १० प्रहरीसहित २२ जना घाइते

झापा- झापाको दमकमा कोसी प्रदेश नामाकरणको बिरोधमा हिजो साँझ पहिचानवादी समूहले मसाल जुलुस प्रर्दशन गर्ने क्रममा झडप हुँदा आन्दोलनकारी र दश प्रहरीसहित २२ जना घाइते भएका छन् । दुई पक्षबिचको झडपमा परी प्रहरी नायव उपरीक्षक मनोजकुमार लामासहित २२ जना घाइते भएको बताइएको छ । करिब ३ सय मिटर टाढादेखि राँको बालेर आएका आन्दोलनकारीहरूलाई दमकको मुख्य गणतन्त्र चोकमा प्रहरीले रोकेर राँको निभाउन खोजेपछि दुई पक्षबिच झडप सुरु भएको थियो । आन्दोलनकारीहरूले प्रहरीमाथि आक्रमण गरेपछि भिडलाई तितरबितर गर्न १९ सेल अश्रुग्याँस, पाँच राउन्ड ब्ल्याक फायर र एक राउन्ड हवाई फायर गरेको प्रहरीको भनाई छ । भिड नियन्त्रणका लागि प्रहरीले चलाएको गोलीको छर्रा लागेर दुइजना आन्दोलनकारी गम्भिर घाइते भएको आन्दोलनमा सहभागी लिम्बुवान भोलेन्टियरका केन्द्रीय कमाण्डर थाङसाङ लावतीले बताउनु भयो । घाइते प्रहरी र आन्दोलनकारीहरूको सरकारी दमक अस्पताल, लाइफलाइन अस्पताल लगायतका स्थानीय अस्पतालहरूमा उपचार भएको छ । घटनापछि दमकको सुरक्षा व्यवस्था थप कडा पारिएको जिल्ला प्रहरी कार्यालय झापाले जनाएको छ ।

यो खबर पढेर तपाईलाई कस्तो महसुस भयो ?