२७ पुष, काठमाडौँ । पोषिलो आहारको लागि दिगो कृषि उत्पादन हाम्रो अभियान’ भन्ने मूल उद्देश्यका साथ स्थापित राष्ट्रिय खाद्य बैंकको तेस्रो वार्षिक साधारण सभा पौष २७ गते ललितपुर शंखमुलको यल दरवार भेन्यूमा सम्पन्न भएको छ । नेपाली रैथाने विउ विजनहरुको संरक्षण गर्दै रैथाने खाद्यन्नहरु किसानको आलीदेखि उपभोक्ताको थालीसम्म पुर्याउने उद्देश्यका साथ स्थापना भएको यो बैंक आफ्नो यात्रामा अघि बढिरहेको छ ।
कार्यक्रममा प्रमुख अतिथि संघीय संसद प्रतिनिधि सभाका सभामुख देवराज घिमिरेको उपस्थिति रहेको थियो । कार्यक्रमलाई शुभकामना मन्तव्य दिदै उहाँले भन्नुभयो, ‘यहाँहरुले गरेको काम सह्रानिय छ । यस खाद्य बैंक लिमिटेडले कृषि उपजको उत्पादन तथा व्यापार प्रवर्धनमा सहयोग गर्ने विश्वास लिएको छु । किसानहरुलाई उत्पादनमा सघाउने तथा उत्पादित अनाजको विक्री वितरण गर्ने कार्य महत्वपूर्ण रहेको छ ।’ कार्यक्रममा उपस्थित सवैलाई हौसला प्रदान गर्दै उहाँले थप भन्नुभयो, ‘नेपाल कुनै समय खाद्यान्न निर्यात गर्ने मुलुक थियो । आज खरवौं धनराशी खाद्यान्न आयातका लागि हामीले खर्चिनु परेको छ । कृषि आधुनिकीकरण गरी प्रविधिको प्रयोग गर्दै भू–उपयोग नीतिलाई प्रभावकारी कार्यान्वयन गरी अघि बढे भोकमारी, अभाव, गरीवीबाट हामी मुक्त हुन सक्छौं । खाद्य बैंक यसको सारथी बन्न सक्छ । कृषिमा मुलुकलाई आत्मनिर्भर बनाउन सरकार र निजी क्षेत्र सहकार्य गरेर अघि बढ्नु पर्ने सभामुख घिमिरेले बताए ।
कार्यक्रमको अध्यक्षता संस्थाका अध्यक्ष शंकरनाथ उप्रेतीले गर्नु भएको थियो । उहाँले सम्पूर्ण अतिथिहरु तथा शेयर सदस्य महानुभावहरुलाई शुभकामना मन्तव्यमा हार्दिक बधाई ज्ञापन गर्नुभयो । उप्रेतीले कृषि क्षेत्रमा परम्परादेखिका असल अभ्यासहरुलाई प्रोत्साहन तथा प्रवर्धन गर्नुका साथै कृषिमा देखापरेका नयाँ प्रविधिहरुको विकास समेत गर्दै लैजाने योजनामा काम भइरहेको बताए । आगामी दिनमा सवै शेयर सदस्य, विज्ञ समूहबाट थप सल्लाह सुझाव पाउने कुरामा आशावादी रहेको समेत बताउनु भयो ।
यो तेस्रो वार्षिक साधारण सभामा राजनीतिज्ञ÷समाजसेवी सिजना सिंहको समेत उपस्थिति रहेको थियो । उहाँले समेत शुभकामना सन्देश दिदै आफु यसको शेयर सदस्य भई सहभागि हुन पाएकोमा खुशी व्यक्त गर्नुभयो ।
कार्यक्रममा बाक्लो संख्यामा शेयर सदस्यहरु, विषय विज्ञ समुह तथा सल्लाहकार समितिका सदस्यहरु समेतको उपस्थिति रहेको थियो । हाल खाद्य बैंकमा किसान, मजदुर, उद्यमी, व्यवसायी, शिक्षक लगायतका सवै क्षेत्रका गरी ८ सय ९१ जना शेयर सदस्य संख्या पुगेको छ । राष्ट्रिय खाद्य बैंक लिमिटेडले ‘राष्ट्रिय खाद्य बैंक स्मारिका २०८०’ समेत प्रकाशन गरेको छ । जसको विमोचन समेत सभामुख घिमिरे गर्नु भएको थियो ।
