काठमाडौं। प्रहरी महानिरीक्षक दिपक थापाको प्रमुख आतिथ्यमा नेपाल पुलिस क्लब भृकुटीमण्डपमा बुधबार आयोजित विशेष समारोहबीच नेपाल प्रहरी श्रीमती संघको ४१औं वार्षिकोत्सव कार्यक्रम सम्पन्न भएको छ । प्रहरी महानिरीक्षक थापाले पानसमा दीप प्रज्वलन गरी उद्घाटन गर्नुभएको उक्त कार्यक्रममा उहाँले संघबाट प्रकाशित वार्षिक स्मारिका “सहचरी २०८२” को विमोचन समेत गर्नुभयो । उक्त अवसरमा प्रहरी महानिरीक्षक थापाले निस्वार्थ सेवाभावले सामाजिक सेवाको विभिन्न क्षेत्रमा महत्वपूर्ण योगदान पुर्याउनुहुने वरिष्ठ मुटुरोग विशेषज्ञ डा.ओम मुर्ति अनिल, वरिष्ठ कलाकार हरिवंश आचार्य, समाजसेवी उत्तम पुडासैनी र राम बहादुर न्यौपानेलाई सम्मानपत्र प्रदान गर्नुभयो ।
अवसरमा प्रहरी महानिरीक्षक थापाले सीमित स्रोत साधनको अधिकतम उपयोग गर्दै संघले आफ्नो स्थापनाकाल देखिनै मानव सेवा एवम् समाज सेवामा समर्पित भई उल्लेखनीय कार्यहरू गर्दै आइरहेको चर्चा गर्दै आगामी दिनमा अझ निस्वार्थ भावले सामाजिक, मानवीय एवम् परोपकारी सेवा प्रवाहमा निरन्तर रूपमा अगाडि बढ्नुपर्ने बताउनुभयो । संघले विभिन्न संघसंस्थासँग समन्वय, सहकार्य एवम् हातेमालो गर्दै समाजमा देखा परेका समस्याहरूको समाधान गर्दै आइरहेको र आगामी दिनहरूमा थप समन्वय र सहकार्यको क्षेत्र पहिचान गरी कार्य गर्नुपर्ने उहाँले बताउनुभयो । समारोहमा विशिष्ट अतिथि नेपाल प्रहरी श्रीमती संघका संस्थापक अध्यक्ष बसुन्धरा लामाले नेपाल प्रहरी श्रीमती संघकी महासचिव अनुश्री पाख्रीन, सामाजिक अभियन्ता कबिता पौडेल पन्त, प्रहरी उपरीक्षक बसुन्धरा खड्का र प्रहरी नायव निरीक्षक कुन्जाङ छोपेल शेर्पालाई सम्मानपत्र प्रदान गर्नुभयो । उक्त अवसरमा नेपाल प्रहरी श्रीमती संघकी अध्यक्ष रूपा थापाले संघका विभिन्न कार्यहरूमा सहयोग पुर्याउनुहुने संघका पदाधिकारीहरू एवम् प्रहरी कर्मचारीहरूलाई प्रशंसापत्र प्रदान गर्नुभयो।समारोहमा संघकी अध्यक्ष थापाले धन्यवाद मन्तव्य व्यक्त गर्दै संघले आफ्नो स्थापनाकाल देखि हालसम्म सेवा, समर्पण र सहकार्यलाई आफ्नो मुल आधार बनाउँदै प्रहरी परिवारको लागि मात्र नभई समाजको हितको लागि निरन्तर योगदान पुर्याउँदै आइरहेको बताउनुभयो ।
संघले आगामी दिनमा आफ्नो सामर्थ्यलाई नयाँ ढंगले विस्तार गरी प्रहरी परिवार र सर्वसाधरणको हितको लागि अझ प्रभावकारी र गुणस्तरीय सेवा प्रदान गर्ने उहाँले बताउनुभयो । नेपाल प्रहरी श्रीमती संघकी महासचिव अनुश्री पाख्रीनले स्वागत मन्तव्य व्यक्त गर्नुभएको उक्त कार्यक्रममा संघका पदाधिकारी तथा सदस्यहरूद्वारा सहचरी गीत प्रस्तुत गर्नुभएको थियो भने विभिन्न कलाकारहरूद्वारा साँस्कृतिक नृत्य तथा गीति नाटक प्रस्तुत गरिएको थियो । सो अवसरमा संघ तथा प्रदेशद्वारा गरिएका विविध कार्यक्रम तथा गतिविधि समेटिएको वृत्तचित्र समेत प्रस्तुत गरिएको थियो । समारोहमा प्रहरी अतिरिक्त महानिरीक्षकहरू, निजामती कर्मचारी श्रीमती संघकी अध्यक्ष, सैनिक श्रीमती संघकी अध्यक्ष, सशस्त्र प्रहरी परिवार महिला संघकी अध्यक्ष लगायत तीन वटै संघका पूर्व अध्यक्षहरू तथा पदाधिकारीहरू, प्रहरी नायव महानिरीक्षकहरू लगायत वरिष्ठ प्रहरी अधिकृतहरु, सञ्चारकर्मीहरू, विभिन्न संघसंस्थाका प्रतिनिधिहरू एवम् आमन्त्रित अतिथिहरूको समेत उपस्थिति रहेको थियो ।
