काठमाडौं / स्टक ब्रोकर एसोसिएसन अफ नेपालले सेयर बजारमा देखिएका समस्या समाधानका लागि अर्थमन्त्री स्वर्णिम वाग्लेलाई ६ बुँदे सुझावपत्र बुझाएको छ। एसोसिएसनका प्रतिनिधिहरूले अर्थ मन्त्रालय पुगेर पुँजी बजारको विकास र विस्तारका लागि तत्काल चाल्नुपर्ने कदमबारे अर्थमन्त्रीको ध्यानाकर्षण गराएका हुन्। एसोसिएसनले हाल देशभर ५६ लाखभन्दा बढी लगानीकर्ता र ९२ वटा ब्रोकर सक्रिय रहेको तथ्यांक प्रस्तुत गर्दै नयाँ सरकार र अर्थमन्त्रीबाट बजारले ठूलो आशा राखेको जनाएको छ।
एसोसिएसनका प्रमुख मागहरू यस्ता छन्:
– पुँजी बजार सुधारका लागि विभिन्न समयमा गठित कार्यदलले दिएका तर कार्यान्वयन हुन बाँकी रहेका सुझावहरू तत्काल लागू गरिनुपर्ने।
– बैंक तथा वित्तीय संस्थाहरूलाई पुँजी बजारमा सहज रूपमा प्रवेश र बहिर्गमनको व्यवस्था गर्नुपर्ने तथा सेयर खरिदपछि ६ महिनासम्म बिक्री गर्न नपाइने व्यवस्था हटाउनुपर्ने।
– गैरआवासीय नेपालीहरूलाई दोस्रो बजारमा सहज रूपमा सेयर कारोबार गर्न पाउने व्यवस्था तत्काल मिलाउनुपर्ने।
– पूँजीगत लाभकरलाई अन्तिम करका रूपमा स्पष्ट पार्दै सरकारी संस्थान तथा विभिन्न कोषहरूको रकम दोस्रो बजारमा लगानी गर्ने वातावरण बनाइनुपर्ने।
– सेयर हस्तान्तरणमा समस्या हुँदा ‘क्लोज आउट’मार्फत लगानीकर्ताले जरिवाना तिर्नुपर्ने अवस्थाको अन्त्य गर्दै बजारलाई सुरक्षित बनाउन ‘अक्सन मार्केट’ छिट्टै सञ्चालनमा ल्याउनुपर्ने।
– २०७५ मा नियमावली र २०७९ मा कार्यविधि बने पनि कार्यान्वयनमा नआएको ‘सेटलमेन्ट ग्यारेन्टी फण्ड’लाई नियामक निकायमार्फत तत्काल कार्यान्वयनमा ल्याउनुपर्ने।
एसोसिएसनले यी मागहरूको कार्यान्वयनबाट पुँजी बजार थप व्यवस्थित, पारदर्शी र लगानीमैत्री बन्ने विश्वास व्यक्त गरेको छ।
