काठमाडौं । नेपाली कम्युनिस्ट पार्टी काठमाडौं निर्वाचन क्षेत्र–२ ले केन्द्रीय सदस्य कृष्णराज सुबेदीको संयोजकत्वमा ५५१ सदस्यीय क्षेत्रीय निर्वाचन परिचालन समिति घोषणा गरेको छ। निर्वाचनलाई प्रभावकारी र संगठित बनाउने उद्देश्यले आयोजना गरिएको कार्यक्रममा पार्टीका वरिष्ठ नेता लीलामणि पोखरेल प्रमुख अतिथिका रूपमा सहभागी थिए।
कार्यक्रममा केन्द्रीय सदस्य जगन्नाथ खतिवडा विशेष अतिथि रहेका थिए भने केन्द्रीय सदस्यहरू शशी श्रेष्ठ, कुमार पौडेल, भगिरथ न्यौपाने लगायतको उपस्थिति रहेको थियो। वक्ताहरूले वर्तमान राष्ट्रिय राजनीतिक परिस्थिति जटिल बन्दै गएको उल्लेख गर्दै त्यसको समाधानका लागि कम्युनिस्ट शक्तिको एकता र जनताको समर्थन आवश्यक रहेको धारणा राखे।
प्रमुख अतिथि पोखरेलले देश राजनीतिक, आर्थिक तथा सामाजिक संकटमा रहेको दाबी गर्दै त्यसको निकास नेपाली कम्युनिस्ट पार्टीले मात्र दिन सक्ने बताए। उनले आम मतदातालाई परिवर्तन र स्थायित्वका लागि मतदानमार्फत साथ दिन आग्रह गरे। विशेष अतिथि खतिवडाले कम्युनिस्ट आन्दोलनमाथि चौतर्फी दबाब र आक्रमण बढेको उल्लेख गर्दै वैचारिक रूपमा अस्पष्ट नयाँ शक्तिहरूलाई बाह्य शक्तिले प्रोत्साहन गरिरहेको आरोप लगाए।
कार्यक्रममा काठमाडौं–२ का उम्मेदवार नितेश पौडेल आकर्षणको केन्द्र बने। उनले आफू यही क्षेत्रको बासिन्दा भएको र विगतदेखि नै विकास–निर्माण तथा जनसेवामा सक्रिय रहेको बताए। स्थानीय समस्या समाधान, युवालाई रोजगारी सिर्जना र आधारभूत पूर्वाधार विस्तार आफ्नो प्राथमिकता हुने उनको भनाइ थियो। शशी श्रेष्ठले महिला सशक्तीकरण र राजनीतिक सहभागितालाई सुदृढ बनाउनुपर्ने आवश्यकता औंल्याउँदै महिलामाथि आउन सक्ने चुनौती सामना गर्न एकजुट हुन आह्वान गरिन्। कार्यक्रमको अध्यक्षता कमरेड रामप्रसादले गरेका थिए भने संयोजक सुबेदीले आगामी निर्वाचन अभियानका विस्तृत कार्यक्रम सार्वजनिक गरेका थिए।
