काठमाडौं, १३ माग। पर्सा, वीरगंज महानगरपालिका-१६ भानुचोकबाट अवैध लागूऔषध खैरो हेरोइन जस्तो देखिने पदार्थ करिब १ सय ग्रामसहित सोही ठाउँ बस्ने ६१ वर्षीय राजबली महतो समेत तीन जनालाई शुक्रबार दिउँसो प्रहरीले पक्राउ गरेको छ । प्रहरी चौकी बसपार्क र लागूऔषध नियन्त्रण ब्यूरो शाखा कार्यालय वीरगंजबाट खटिएको प्रहरीले उनीहरूलाई उक्त पदार्थसहित पक्राउ गरेको हो ।
बाँके, नेपालगंज उपमहानगरपालिका-१५ जमुनाहबाट अवैध लागूऔषध ब्राउनसुगर जस्तो देखिने पदार्थ करिब २ ग्रामसहित सुर्खेत गुर्भाकोट नगरपालिका-९ बस्ने २१ वर्षीय राज वलीलाई शुक्रबार बेलुकी प्रहरीले पक्राउ गरेको छ । ईलाका प्रहरी कार्यालय जमुनाह र लागूऔषध नियन्त्रण ब्यूरो नेपालगंजबाट खटिएको प्रहरीले उनलाई उक्त पदार्थसहित पक्राउ गरेको हो ।
रौतहट, मौलापुर नगरपालिका-५ चोकबाट नियन्त्रित लागूऔषध नाईट्राभेट २ सय ८९ ट्याब्लेटसहित फतुवा बिजयपुर नगरपालिका-८ बिजयपुर बस्ने २८ वर्षीय संजय कुमार दासलाई शनिबार बिहान प्रहरीले पक्राउ गरेको छ । ईलाका प्रहरी कार्यालय मौलापुरबाट खटिएको प्रहरीले बारा पटेर्वाबाट बिजयपुरतर्फ जाँदै गरेको ना.१३ प ४१९२ नम्बरको मोटरसाइकललाई जाँच गर्ने क्रममा मोटरसाइकलमा सवार उनलाई उक्त लागूऔषधसहित पक्राउ गरेको हो । यस सम्बन्धमा प्रहरीले आवश्यक अनुसन्धान गरिरहेको छ ।
