२०८० साउन ११ काठमाडौँ। बुधबार (१०गते) लघुवित्त पीडितहरुका तर्फबाट अध्यक्ष मणिराम ज्ञवाली लगायतका पाँच जना पीडितहरुले काठमाडौंको माइतीघर मण्डलामा आमरण अनसन गरेको १४ दिन पुगेको छ । यस क्रममा पीडितहरुले सभा, जुलुस, धर्ना, चक्काजाम लगायतका आन्दोलनका विभिन्न कार्यक्रम गर्न लागेको भने महिनौं भएको छ । यति गर्दै अन्तमा अनशनकारीहरु मरणासन्न हुँदा पनि सरकारले भेटघाट, सोधपुछ र वार्ता प्रकृया आदि कुनै कुरा सुरु गरेको छैन । यसरी पीडित जनताका पीरमर्काहरुको कुनैपनि सुनुवाइ नगरेको मात्र होइन कि सुन्ने नियत र आँटसम्म पनि नगरेकोप्रति हाम्रो मोर्चा – ‘राष्ट्रिय क्रान्तिकारी मोर्चा, नेपाल’ को गम्भीर ध्यानाकर्षण भएको छ । यस सन्दर्भमा मोर्चाका तर्फबाट आज हामी केही प्रतिनिधिहरु अनसनस्थलमै गै आन्दोलन र आन्दोलनकारीहरुप्रति ऐक्यबद्धता र समर्थन व्यक्त गर्यौं ।
यतिबेला देसमा लघुवित्त, सहकारी, फाइनान्स लगायतका बैंक तथा वित्तीय संस्थाहरुबाट र मिटरब्याजे साहूहरुबाट गरीब–दुखी किसान–मजदुरहरु र साना उद्योगी–व्यवसायीहरु, थोरै बचतकर्ताहरु र पेवा बचतकर्ता महिला आमा–दिदीबहिनीहरु अत्यन्त अमानवीय, अन्याय, अत्याचार र अपमानपूर्ण शोषण–दमन र उत्पीडनमा परेका छन् । यसरी निर्धा–निमुखा जनसाधारणहरुका बचत गरेका पैसा मात्र होइन कथित ऋृण–कर्जाका नाममा चर्को ब्याज, स्याज, जरिमानाजस्ता विभिन्न अस्वाभाविक, अनावस्यक र अतिशयजन्य कृयाकलापका कारण घरजग्गा लिलाम भै लुटिएर उनीहरुलाई गासबास र कपासविहीन तुल्याई रुवाबास र बिल्लिबाँठ पारिएको छ । तर परम आश्चर्य र चरम खेदको कुरा अझ के भएको छ भने आफूलाई शोषित–पीडित जनताको मुक्ति र प्रगतिको लागि दस बर्षे जनयुद्ध गरेर सत्र हजारको बलिदानको जगमा बनेको गर्व गरेर नथाक्ने नेकपा माओवादी केन्द्र र त्यसका सार्वकालिक नेता प्रचण्डको नेतृत्वको वर्तमान सरकारले यस्तो आन्दोलनको कुनै सुइंकोसम्म पनि नपाएझैं गरेर अनदेखा गर्दै बूझ पचाइरहेका छन् । यसको कारण स्पष्ट छ कि पार्टी र सरकारका उच्चपदस्थ नेता–शासकहरु नै यी शोषक संस्था र व्यक्तिहरुसँग मिलोमतो गरेर दलाली खाइरहेका छन् र उनीहरु त यी शोषक–साहूहरुको संरक्षण गर्दै शोषित–उत्पीडित जनसमुदायहरुलाई `जेसुकै गरून्, मरे पनि मरून्’ भन्ने आपराधिक मानसिकतामा पुगेका छन् । हामी यो लाल आवरणको दलाल सरकारको यस्तो ढोंगी र पाखण्डी चिन्तन, चरित्र र काम–व्यवहारको घोर निन्दा र भत्सर्ना गर्न चाहन्छौं । साथै, आमरण अनसनमा बसेका लघुवित्तपीडितहरु लगायत सम्पूर्ण आन्दोलित शोषित–पीडित जनसमुदायहरुका जायज र न्यायपूर्ण सबै मागहरु तत्काल पूरा गरोस् भन्न चाहन्छौं । यसक्रममा हामी चेतावनी दिन चाहन्छौं कि सरकारले पीडित आन्दोलनकारीहरुसंँग सफा नियतले इमान्दारीपूर्वक अविलम्ब वार्ता गरोस् अनि समस्याको शान्तिपूर्ण र वैधानिक रुपले सरल, शीघ्र र समग्ररुपमा स्थायी समाधान देओस् ! अन्यथा, देसभरिका सबै प्रकारका सम्पूर्ण शोषित–पीडित जनसमुदायहरुको एकताबद्ध, संयुक्त र सशक्त निर्णायक आन्दोलनको शिकार बन्न वर्तमान दलाल पुँजीवादी सत्तासँगै यो प्रतिक्रियावादी प्रचण्ड नेतृत्वको गठबन्धन सरकार, संसदवादी पार्टी र व्यवस्था आफूहरुको अन्त्यको दृष्य हेर्न र भोग्न तयार होऊन् !तसर्थ, सर्वप्रथम आमरण अनसनमा बस्नुभएका आन्दोलनकारीहरुको बाँच्न पाउने विश्वव्यापी मानव अधिकारको सम्मान गर्दै शीघ्रातिशीघ्र वार्ता सुरु गरेर माग पूरा गरी जीवन रक्षा गर्न जोडदार माग गर्दछौं ! होइन भने यसबाट उत्पन्न गम्भीरतम र जटिलतम परिणामको मुख्य जिम्मेवार स्वयं प्रचण्ड, उनको नेतृत्वको सरकार र दल नै हुनुपर्ने छ भन्ने स्मरण गराउन पनि चाहन्छौं ।
नारायण शर्मा
संयोजक
राष्ट्रिय क्रान्तिकारी
मोर्चा, नेपाल।
