काठमाडौं, २१ भदौ । नवलपरासी पश्चिम, बर्दघाट नगरपालिका-१४ चौपत्तास्थित सडकमा युपि ५६ एएन ९६४९ नम्बरको मोटरसाइकलबाट खसेर मोटरसाइकलमा सवार भारत उत्तर प्रदेश घर भएकी ४५ वर्षीया मिरादेबी चौरासियाको बुधबार दिउँसो मृत्यु भएको छ । दुर्घटनामा गम्भीर घाइते भएकी उनको सहिद स्मृति सामुदायिक अस्पताल चौपत्ता हुँदै जिल्ला अस्पताल परासीमा थप उपचारको क्रममा मृत्यु भएको हो । मोटरसाइकल चालकलाई प्रहरीले नियन्त्रणमा लिएको छ ।
पर्सा, वीरगंज महानगरपालिका-१६ स्थित सडकमा ना.५५ प ७२८६ नम्बरको मोटरसाइकलको ठक्करबाट पैदलयात्री भारत घर भएका ५० वर्षीय सत्यनारायण यादवको बुधबार राति मृत्यु भएको छ । दुर्घटनामा गम्भीर घाइते भएका उनको उपचारको लागि नारायणी अस्पताल वीरगंजतर्फ लैजाने क्रममा बाटोमै मृत्यु भएको हो । मोटरसाइकल चालकलाई प्रहरीले नियन्त्रणमा लिएको छ ।
सिन्धुपाल्चोक, भोटेकोशी गाउँपालिका-२ कोदारी बजार नजिक सडकमा बा.प्र.०२-०४३ प २८२१ नम्बरको स्कुटरको ठक्करबाट मकवानपुर रक्सीराङ गाउँपालिका-९ घर भई ईलाका प्रहरी कार्यालय कोदारीमा कार्यरत प्रहरी हवल्दार शिवन कुमार प्रजाको बुधबार राति मृत्यु भएको छ । ईलाका प्रहरी कार्यालय कोदारीबाट पैदल गस्ती गर्ने क्रममा स्कुटरले ठक्कर दिई गम्भीर घाइते भएका उनको प्राथमिक स्वस्थ्य केन्द्र बाह्रविसे हुँदै धुलिखेल अस्पतालमा थप उपचारको क्रममा मृत्यु भएको हो । स्कुटर चालकलाई प्रहरीले नियन्त्रणमा लिएको छ ।
यो पनि पढ्नुहोस्।
कैलाली, धनगढी उपहमानगरपालिका-१२ डि गाँउस्थित खेतमा सोही ठाउँ बस्ने ४० वर्षीय महादेव भट्ट बुधबार मृत अवस्थामा फेला परेका छन् ।
धनकुटा, चौबिसे गाउँपालिका-८ खोलीटार बस्ने २७ वर्षीया मिना लावती आफ्नै घरको कोठामा बुधबार मृत अवस्थामा फेला परेकी छन् । पर्वत, जलजला गाउँपालिका-८ लस्तीस्थित कालीगण्डकी नदीको किनारमा हाल नाम, थर, वतन नखुलेका अन्दाजी २८ वर्षीय पुरुष बुधबार मृत अवस्थामा फेला परेका छन् ।
देवचुली नगरपालिका-१ गैडाटोल बस्ने ५१ वर्षीया बिष्णु बोटेको सोही ठाउँस्थित माछापोखरीमा डुबेर बुधबार दिउँसो मृत्यु भएको छ । डुबेर अशक्त भएकी उनको देवचुली नगर अस्पताल दुम्कौलीमा उपचारको क्रममा मृत्यु भएको हो । सबै घटना सम्बन्धमा प्रहरीले आवश्यक अनुसन्धान गरिरहेको छ ।
