काठमाडौं, जेठ ७ । राष्ट्रिय वाणिज्य बैंक ले उदय परियोजना अन्तर्गत “कोशी प्रदेश साना तथा मझौला उद्यम कर्जा” लगानी गर्ने भएको छ । साना तथा मझौला कर्जा लगानीलाई प्रोत्साहन गर्ने उद्देश्यले बैंक र निक्षेप तथा कर्जा सुरक्षण कोष बीच भएको सम्झौताअनुसार “सुरक्षण योगदानमा आधारित कर्जाको पोर्टफोलियो सुरक्षण योजना २०८२” कार्यान्वयनमा ल्याइएको बैंकले जनाएको छ ।
स्विजरल्याण्ड सरकारको Swiss Agency for Development and Cooperation तथा कोशी प्रदेश सरकारको संयुक्त लगानी रहेको उदय परियोजना अन्तर्गत कोशी प्रदेशका साना तथा मझौला उद्यम व्यवसायमा प्रवाह हुने कर्जाको सुरक्षण गरिनेछ । यसका लागि प्रदेश सरकारको आर्थिक मामिला तथा योजना मन्त्रालय र निक्षेप तथा कर्जा सुरक्षण कोषबीच स्थापना भएको “कोशी प्रदेश साना तथा मझौला उद्यमी कर्जा सुरक्षण कोष” मार्फत कर्जा सुरक्षणको व्यवस्था गरिएको बैंकले जनाएको छ ।
बैंकका अनुसार योजना अन्तर्गत RBB SME Loan प्रोडक्ट पेपरको अधिनमा रही कृषि, उद्योग, सेवा लगायत साना तथा मझौला व्यवसाय क्षेत्रमा ३० लाख रुपैयाँदेखि ३ करोड रुपैयाँसम्म कर्जा प्रवाह गरिनेछ । कर्जामा बैंकको नियमानुसार न्यूनतम ब्याजदर र प्रशोधन शुल्क कायम गरिएको जनाइएको छ ।
वि.सं. २०२२ साल माघ १० गते स्थापना भएको राष्ट्रिय वाणिज्य बैंकले हाल देशभर ३१४ शाखा कार्यालय, ७१ एक्सटेन्सन काउन्टर, ३३४ एटिएम तथा ९९ शाखारहित बैंकिङ सेवामार्फत ४७ लाखभन्दा बढी ग्राहकलाई सेवा दिँदै आएको छ । बैंकका उप कार्यकारी अधिकृत तथा सूचना अधिकारी पवन रेग्मीले उक्त जानकारी दिएका हुन् ।
