काठमाडौं। इन्धनसहित निर्माण सामग्रीमा भएको अत्यधिक मूल्यवृद्धिको विरोधमा नेपाल निर्माण व्यवसायी महासंघ ले सडक विभाग र जलस्रोत विभागमा ज्ञापनपत्र बुझाउँदै धर्ना दिएको छ।
महासंघ तथा यससँग आबद्ध एशोसिएट सदस्य समन्वय समितिले बिहीबार आयोजना गरेको धर्नामा व्यवसायीहरूले सरकारको बेवास्ताका कारण देशभरका धेरै आयोजना बन्द हुने अवस्थामा पुगेको बताएका छन्। व्यवसायीहरूले सडक विभागका महानिर्देशक विजय जैसी र सिँचाइ विभागका उपनिर्देशक डा. सन्तोष कैनीलाई ध्यानाकर्षण पत्र बुझाएका हुन्। महासंघका महासचिव शिवहरी घिमिरेले निर्माण सामग्रीको चर्को मूल्यवृद्धिका कारण व्यवसायीहरू गम्भीर संकटमा परेको बताए।
उनले बढेको बजार मूल्यअनुसार ठेक्का रकम समायोजन गर्नुपर्ने, रोकिएका आयोजनाको म्याद थप गरी २०८४ असारसम्म काम गर्ने वातावरण बनाउनुपर्ने माग गरे। साथै आगामी बजेटमा आयोजनाका लागि स्पष्ट बजेट शीर्षक र भुक्तानीको सुनिश्चितता हुनुपर्ने उनको भनाइ छ। आन्दोलनकै क्रममा व्यवसायीमाथि भइरहेको धरपकडप्रति पनि महासंघले आपत्ति जनाएको छ। अनुसन्धानको नाममा व्यवसायीलाई दुःख दिँदा लगानीको वातावरण बिग्रिएको महासंघको आरोप छ। महासंघले ७७ वटै जिल्लाका प्रमुख जिल्ला अधिकारीमार्फत सरकारलाई ज्ञापनपत्र बुझाउने लगायत थप आन्दोलनका कार्यक्रमसमेत घोषणा गरेको छ। निर्माण व्यवसायीका अनुसार इन्धनको मूल्यवृद्धिसँगै सिमेन्ट, डण्डी, बालुवा लगायत सामग्रीको मूल्य बढेको छ भने बिटुमिन अभावले सडक निर्माणमा प्रत्यक्ष असर परेको छ। मूल्य समायोजन निर्देशिका तत्काल लागू गर्नुपर्ने र मूल्यवृद्धिबाट परेको असरमा सहुलियत दिनुपर्ने माग पूरा नभएसम्म काम अघि नबढाउने चेतावनी व्यवसायीहरूले दिएका छन्।
