२०८१ वैशाख ७, काठमाडौँ । मकवानपुर जिल्लाको बकैया गाउँपालिका वार्ड नं दुई (२)स्थित रिखेश्वर सामुदायिक वनमा त्यहाँका केही बिचौलिया र स्थानीय तस्करहरूको मिलेमतोमा सालको रुख तथा काठहरू अनाधिकृत रुपमा ओसारपसार गरेको पाइएको छ। रिखेश्वर सामुदायिक वनका केही कर्मचारी र बिचौलिया मिली जंगलमा रहेको सालका रुख धमाधम फडानी गरी ओसारपसार गर्न लागेपछि त्यहाँको वातावरण बिग्रने र जनतामा त्यसको प्रत्यक्ष असर पर्न सक्ने भन्दै केही युवाहरु मिलेर वन तथा वातावरण मन्त्रालयमा निवेदन दिएका छन्।
स्थानीय प्रशासनलाई जानकारी गराउँदा पनि कुनै सुनवाई नभएपछि त्यहाँका बासिन्दाले मन्त्रालयसम्म पुगी ध्यानाकर्षण गराएका हुन् । निवेदनमा भनिएको छ, वनजङ्गल संरक्षण गर्नु हामी सबैको कर्तव्य हो। त्यसभित्र हुने गरेको अनाधिकृत सालका रुख फडानी र ओसारपसारले वातावरणलाई प्रत्यक्ष असर गरिरहेको हुँदा त्यसबाट प्रकृतिलाई वातावरणलाई पर्ने असर रोकी वनको संरक्षण गरी गराई पाउँ भनी मन्त्रालयमा उजुरी परेको हो।
