काठमाडौं, ७ मंसिर। झापा, मेचिनगर नगरपालिका-६ स्थित पुरानो मेची पुलबाट अवैध लागूऔषध खैरो हेरोइन जस्तो देखिने पदार्थ १ ग्रामसहित २ जनालाई बुधबार दिउँसो प्रहरीले पक्राउ गरेको छ । पक्राउ पर्नेहरूमा सोही नगरपालिका-९ बस्ने २८ वर्षीय अरुण दर्जी र सोही नगरपालिका-१० सातपाखे डाँडा बस्ने ४६ वर्षीय भोज बहादुर सार्की रहेका छन् । लागूऔषध नियन्त्रण ब्यूरो काँकरभिट्टाबाट खटिएको प्रहरीले भारतबाट नेपालतर्फ साईकलमा आउँदै गरेका उनीहरूलाई जाँच गर्ने क्रममा उक्त पदार्थसहित पक्राउ गरेको हो । साथै सोही ठाउँबाट खैरो हेरोईन जस्तो देखिने पदार्थ ५ ग्राम १ सय मिलिग्रामसहित सोही नगरपालिका-३ भृकुटी बस्ने २२ वर्षीय युवराज गिरीलाई बुधबार दिउँसो प्रहरीले पक्राउ गरेको छ । लागूऔषध नियन्त्रण ब्यूरो काँकरभिट्टाबाट खटिएको प्रहरीले भारतबाट नेपालतर्फ आउँदै गरेको प्र.१-०१-०१५ प.७३३४ नम्बरको स्कुटरलाई जाँच गर्ने क्रममा उनलाई उक्त पदार्थसहित पक्राउ गरेको हो ।
रूपन्देही, बुटवल उपमहागरपालिका-११ देबिनगर श्रेष्ठपथबाट अवैध लागूऔषध ब्राउन सुगर जस्तो देखिने पदार्थ ७.९० ग्रामसहित सोही ठाउँ बस्ने २८ वर्षीय सुनिल श्रेष्ठ र सोही उपमहानगरपालिका-९ मिलनचोक बस्ने २१ वर्षीय साहिल थापासमेत ४ जनालाई बुधबार साँझ प्रहरीले पक्राउ गरेको छ । सुनिल श्रेष्ठको घरमा लागूऔषध ब्राउन सुगर बिक्री बितरण भइरहेको भन्ने सूचनाको आधारमा वडा प्रहरी कार्यालय बुटबलबाट खटिएको प्रहरीले श्रेष्ठको घर तलासी गर्दा उनको साथबाट ६.६० ग्राम र साहिल थापाको साथबाट १.३० ग्राम लागूऔषध ब्राउन सुगर जस्तो देखिने पदार्थ फेला पारी उनीहरूलाई पक्राउ गरेको हो ।
मोरङ, विराटनगर महानगरपालिका-१८ फोरलाइनस्थित खेतबाट अवैध लागूऔषध गाँजा करिब ८१ किलोग्राम बुधबार राति प्रहरीले बरामद गरेको छ । ईलाका प्रहरी कार्यालय बुधनगरबाट खटिएको प्रहरीले उक्त गाँजा फेला पारी बरामद गरेको हो । साथै सोही खेतबाट अवैध लागूऔषध गाँजा करिब १ सय १५ किलोग्राम बिहीबार बिहान प्रहरीले बरामद गरेको छ । ईलाका प्रहरी कार्यालय बुधनगरबाट खटिएको प्रहरीले उक्त गाँजा फेला पारी बरमाद गरेको हो । यस सम्बन्धमा प्रहरीले आवश्यक अनुसन्धान गरिरहेको छ ।
