२३ मंसिर,काठमाडौं । राष्ट्रिय वाणिज्य बैंक लिमिटेडले आफ्ना देशभरका कर्जा लगानी तथा निक्षेप संकलनमा महत्वपूर्ण भूमिका निर्वाह गरिरहेका ६७ शाखा कार्यालयहरूको Business Meet 2082 मंसिर १८ र १९ गते चितवन, सौराहामा सम्पन्न गरेको छ। बैंक सञ्चालक समितिका अध्यक्ष देव कुमार ढकालको अध्यक्षतामा सम्पन्न कार्यक्रममा हालको बैंकिङ् बजारको आवश्यकता, अवसर र जिम्मेवारीबारे विस्तृत अन्तक्र्रिया गरिएको थियो।
कार्यक्रममा बैंकका कर्मचारीहरूको क्षमता अभिवृद्धि गर्दै बैंकमा रहेको प्रचुर निक्षेपलाई गुणात्मक कर्जामा रूपान्तरण गर्ने उपायहरूबारे प्रत्येक शाखाले सम्भावित ग्राहकहरूको अवस्था सहित आफ्ना कार्ययोजना प्रस्तुत गरेका थिए। अध्यक्ष ढकालले बैंकको व्यवसाय विस्तार योजनामा विशेष ध्यान दिनुपर्ने, क्षेत्रगत सम्भावनालाई पहिचान गर्दै प्रभावकारी व्यवसाय योजना बनाउनुपर्ने तथा सरकारी बैंकप्रति जनमानसमा थप सकारात्मक धारणा निर्माण गर्न सेवा प्रवाहलाई अझ चुस्त र प्रभावकारी बनाउनुपर्ने निर्देशन दिए।
सञ्चालक समिति सदस्य हरि कुमार सिलवालले बैंकको युवा तथा ऊर्जावान मानव स्रोतलाई व्यवसाय विस्तारको अवसरमा बदल्नुपर्ने धारणा राखे। त्यस्तै, प्रमुख कार्यकारी अधिकृत देवेन्द्र रमण खनालले बैंकमा उपलब्ध निक्षेपलाई अवसरका रूपमा उपयोग गर्दै गुणस्तरीय कर्जा वृद्धिमा रूपान्तरण गर्ने रणनीति प्रस्तुत गरेका थिए। उनले शाखा प्रबन्धकहरूलाई कर्जा विस्तार लक्ष्यअनुसार कार्य गर्न, सेवाग्राहीप्रति व्यवहारमा सकारात्मकता ल्याउन तथा गुनासा नआउने वातावरण बनाउन निर्देशन दिए। साथै गुणस्तरीय कर्जा विस्तारका लागि शाखादेखि केन्द्रसम्मका कर्मचारीको क्षमता अभिवृद्धि तालिमलाई बैंकले प्राथमिकता दिने बताएका थिए। कार्यक्रममा उपकार्यकारी अधिकृत पवन रेग्मीले सहजकर्ताको भूमिका निभाएका थिए भने औपचारिक सञ्चालन विभागीय प्रमुख आनन्द सुवेदीले गरेका थिए। बैंकका नायव प्रमुख कार्यकारी अधिकृत देवेश प्रसाद लोहनीले स्वागत मन्तव्य दिएका उक्त कार्यक्रममा उपकार्यकारी अधिकृतहरू, विभागीय प्रमुखहरू, प्रादेशिक प्रबन्धकहरूलगायतको उपस्थिति थियो।
