काठमाडौँ । आगामी फागुन २१ गते हुने प्रतिनिधिसभा सदस्य निर्वाचनको तयारीस्वरूप आज देशभरका १६५ वटै निर्वाचन क्षेत्रमा मुख्य निर्वाचन अधिकृत तथा निर्वाचन अधिकृतको कार्यालय स्थापना गरिँदैछ ।
निर्वाचन आयोगका सहायक प्रवक्ता कुलबहादुर जिसीका अनुसार जिल्ला सदरमुकाममा मुख्य निर्वाचन अधिकृतको कार्यालय र सदरमुकाम बाहिर रहेका निर्वाचन क्षेत्रमा निर्वाचन अधिकृतको कार्यालय स्थापना गरिनेछ । यसअनुसार ७७ वटा जिल्ला सदरमुकाममा मुख्य निर्वाचन अधिकृतको कार्यालय र ८८ प्रतिनिधिसभा निर्वाचन क्षेत्रमा निर्वाचन अधिकृतको कार्यालय सञ्चालनमा आउनेछन् ।
मुख्य निर्वाचन अधिकृतको कार्यालयको नेतृत्व जिल्ला अदालतका मुख्य न्यायाधीशले गर्ने व्यवस्था गरिएको छ । सोहीअनुसार ७७ जना मुख्य जिल्ला न्यायाधीशलाई मुख्य निर्वाचन अधिकृतको जिम्मेवारी दिइएको छ । त्यस्तै, न्याय सेवाका ८८ जना द्वितीय श्रेणीका अधिकृतलाई निर्वाचन अधिकृतको जिम्मेवारी तोकिएको निर्वाचन आयोगले जनाएको छ । निर्वाचन अधिकृतका कार्यालय स्थापना भएसँगै उम्मेदवारी दर्ता, निर्वाचन आचारसंहिता कार्यान्वयन तथा अन्य निर्वाचनसम्बन्धी प्रशासनिक कामहरू तीव्र रूपमा अघि बढ्ने आयोगले अपेक्षा गरेको छ ।
