काठमाडौं, चैत्र ४ / पेशागत महासङ्घ नेपालले नयाँ बन्ने सरकारले भन्दै आएको ट्रेड युनियन खारेजीको विषयमा आपत्ति जनाएको छ । महासङ्घले अब बन्ने सरकारलाई पनि सहयोग गर्ने भएको छ ।महासङ्घका अध्यक्ष पुण्यप्रसाद ढकालद्वारा जारी विज्ञप्तीमा हिजोको दिनमा जस्तै ‘सुखी नेपाली, समृद्ध नेपाल’को लक्ष्य पूरा गर्ने काममा महासङ्घ र आफूहरुसम्बद्धले अझै बढी जिम्मेवारीका साथ काम गर्ने प्रतिबद्धता जनाइएको छ । महासङ्घले हालै सम्पन्न प्रतिनिधि सभाको निर्वाचनमा लगभग दुई तिहाई नजिकको जनमत पाएको राष्ट्रिय स्वतन्त्र पार्टी (रास्वपा) लाई बधाई दिँदै सफल कार्यकालको शुभकामना व्यक्त गरेको छ । उसले जनताको मन जितेर काम गर्न पनि अब बन्ने नयाँ सरकारलाई आग्रह गरेको छ ।
महासङ्घले राष्ट्रिय तथा अन्तर्राष्ट्रिय मान्यता अनुरुप चल्दै आएको ट्रेड युनियन खारेजीको विषय आउनु आफैंमा अस्वभाविक र आपत्तिजनक भएको भन्दै सचेत रहन सबैलाई आग्रहसमेत गरेको छ।महासङ्घले प्रधानमन्त्री सुशीला कार्कीले उच्चपदस्थ निजामती कर्मचारीले आफ्नो स्वार्थ अनुरुप मात्रै काम गरे भनेर दिएको अभिव्यक्ति प्रति आपत्ति जनाएको छ।उसले त्यस्ता कर्मचारीलाई कार्बाही गर्नुको सट्टा प्रधानमन्त्रीले बाहिर बोल्नु गलत भएको समेत टिप्पणी गरेको छ । महासङ्घले निजामती कर्मचारीको सहयोगमा नै फाल्गुण २१ गतेको निर्वाचन सफल भएकाले त्यो पनि स्मरण गर्न समेत प्रधानमन्त्री र सरकारलाई अनुरोध गरेको छ । महासङ्घले अबको सरकारलाई जनताको मन जित्ने कानुन र नीति नियम बनाउन आग्रह पनि गरेको छ । महासङ्घले २६ वटा राष्ट्रियस्तरका घटक र प्रतिष्ठानस्तरका ५० भन्दा बढी संस्था आफूहरुसँग आबद्ध भएको र त्यहाँ ५ लाखभन्दा बढी जनशक्ति रहेको समेत स्मरण गराएको छ ।
