२०८३ असार १५, काठमाडौं । नेपाल टेलिकमले प्रिपेड मोबाइल प्रयोगकर्ताका लागि मासिक रूपमा स्वतः नवीकरण हुने (Subscription-Based Model) नयाँ प्रिपेड प्याकेज सार्वजनिक गरेको छ। यस व्यवस्थाअन्तर्गत ग्राहकले एकपटक प्याकेज सक्रिय गरेपछि हरेक महिना पुनः सब्सक्राइब गर्नुपर्ने आवश्यकता नपर्ने कम्पनीले जनाएको छ। मोबाइल ब्यालेन्स पर्याप्त भएमा प्याकेज स्वतः नवीकरण हुनेछ। कम्पनीले ३० दिन अवधिका तीनवटा प्याकेज उपलब्ध गराएको छ।
‘नमस्ते किरिङ २९९’ प्याकेजको मूल्य २९९ रुपैयाँ रहेको छ। यसमा सबै नेटवर्कमा ३०० मिनेट कल, जुनसुकै समयमा प्रयोग गर्न मिल्ने ४ जीबी डेटा, राति ११ बजेदेखि बिहान ६ बजेसम्म प्रयोग गर्न मिल्ने २ जीबी नाइट डेटा तथा नेपाल टेलिकम नेटवर्कभित्र पठाउन मिल्ने २० वटा एसएमएस उपलब्ध हुनेछन्। ‘नमस्ते किरिङ ४९९’ प्याकेज ४९९ रुपैयाँमा उपलब्ध हुनेछ। यसमा सबै नेटवर्कमा ५०० मिनेट कल, ८ जीबी डेटा, ४ जीबी नाइट डेटा तथा सबै नेटवर्कमा पठाउन मिल्ने १०० वटा एसएमएस समावेश गरिएको छ।
‘नमस्ते किरिङ ७९९’ प्याकेजको मूल्य ७९९ रुपैयाँ तोकिएको छ। यसमा सबै नेटवर्कमा असीमित कल, प्रतिदिन १० जीबी (मासिक ३०० जीबी) डेटा तथा सबै नेटवर्कमा ३०० वटा एसएमएस सुविधा उपलब्ध हुनेछ। यसका अतिरिक्त, आवश्यकताअनुसार एड-अन (Add-on) डेटा प्याक पनि उपलब्ध गराइएको छ। ३० रुपैयाँमा १ दिनका लागि १ जीबी, ५० रुपैयाँमा ३ दिनका लागि २ जीबी र ९९ रुपैयाँमा ७ दिनका लागि ४ जीबी डेटा लिन सकिनेछ। ग्राहकले *1415# डायल गरी प्राप्त निर्देशनअनुसार यी प्याकेज खरिद गर्न सक्ने नेपाल टेलिकमले जनाएको छ।
