काठमाडौं । संविधान दिवस २०८३ को अवसरमा नेपाल टेलिकमले प्रिपेड तथा पोस्टपेड मोबाइल प्रयोगकर्ताका लागि विशेष डेटा अफर सार्वजनिक गरेको छ। नेपाल टेलिकमका अनुसार अफरअन्तर्गत अनलिमिटेड लाइट ४९९ र अनलिमिटेड प्रो ६९९ गरी दुई प्रकारका डेटा प्याकेज उपलब्ध हुनेछन्। ४९९ रुपैयाँको अनलिमिटेड लाइट प्याकेजमा ३० दिनसम्म दैनिक ५ जीबी डेटा प्रयोग गर्न सकिनेछ। दैनिक ५ जीबीको सीमा पूरा भएपछि बाँकी समय २ एमबीपीएस गतिको अनलिमिटेड डेटा प्रयोग गर्न सकिने कम्पनीले जनाएको छ।
त्यस्तै, ६९९ रुपैयाँको अनलिमिटेड प्रो प्याकेजमा ३० दिनसम्म दैनिक १० जीबी डेटा उपलब्ध हुनेछ। दैनिक १० जीबीको सीमा सकिएपछि बाँकी समय ३ एमबीपीएस गतिको अनलिमिटेड डेटा प्रयोग गर्न सकिनेछ। नेपाल टेलिकमले पोस्टपेड मोबाइल प्रयोगकर्ताका लागि रेन्टल चार्जसमेत प्याकेजमै समावेश गरेको जनाएको छ। कम्पनीका अनुसार यो अफर २०८३ असोज २ गतेदेखि असोज ४ गतेसम्म तीन दिन मात्र उपलब्ध हुनेछ।
अफर प्राप्त गर्न ग्राहकले आफ्नो मोबाइलबाट *1415*11# डायल गर्न वा नेपाल टेलिकम एप प्रयोग गर्न सक्नेछन्। नेपाल टेलिकमका प्रवक्ता डा. कमल लामिछानेले संविधान दिवसको अवसरमा ग्राहकलाई लक्षित गरी उक्त विशेष अफर ल्याइएको जानकारी दिएका छन्।
