काठमाडौं । नेपाल टेलिकम ले चालु आर्थिक वर्ष २०८२/८३ को तेस्रो त्रैमासिकसम्म उत्साहजनक वित्तीय प्रगति हासिल गरेको छ। कम्पनीले सार्वजनिक गरेको अपरिष्कृत वित्तीय विवरणअनुसार सञ्चालन आय, खुद मुनाफा र प्रति शेयर आम्दानीमा उल्लेखनीय वृद्धि देखिएको हो। कम्पनीका अनुसार तेस्रो त्रैमासिकसम्म कुल सञ्चालन आय रु. २५ अर्ब ९२ करोड ९६ लाख पुगेको छ। यो रकम गत आर्थिक वर्षको सोही अवधिको रु. २५ अर्ब ३१ करोड ७६ लाखको तुलनामा रु. ६१ करोड २० लाख अर्थात् २.४२ प्रतिशतले बढी हो।
त्यस्तै, कुल आय रु. २८ अर्ब ८५ करोड ४८ लाख पुगेको छ, जुन अघिल्लो वर्षको सोही अवधिको तुलनामा रु. ४२ करोड ३३ लाख अर्थात् १.४९ प्रतिशतले वृद्धि भएको कम्पनीले जनाएको छ।
मुनाफातर्फ पनि कम्पनीले सुधार देखाएको छ। तेस्रो त्रैमासिकसम्म EBITDA रु. १४ अर्ब ३८ करोड २ लाख पुगेको छ। यो अघिल्लो वर्षको तुलनामा रु. १८ करोड ८० लाख अर्थात् १.३२ प्रतिशतले बढी हो।
सबैभन्दा उल्लेखनीय रूपमा खुद मुनाफा ९.८५ प्रतिशतले बढेर रु. ६ अर्ब २७ करोड २९ लाख पुगेको छ। गत वर्ष सोही अवधिमा कम्पनीको खुद मुनाफा रु. ५ अर्ब ७१ करोड ५ लाख रहेको थियो।
कम्पनीको वार्षिकीकरण गरिएको प्रति शेयर आम्दानी (EPS) पनि बढेर रु. ४६.४७ पुगेको छ। गत वर्ष सोही अवधिमा EPS रु. ४२.३ रहेको थियो। नेपाल टेलिकमका अनुसार GSM सेवाबाट प्राप्त राजश्वमा रु. ५७ करोड ७४ लाख अर्थात् २.७६ प्रतिशत वृद्धि हुनु तथा ह्रासकट्टी खर्च ८.४६ प्रतिशतले घट्नुले खुद मुनाफा बढाउन सहयोग पुगेको हो। यद्यपि, बजारमा ब्याजदर निरन्तर घट्दै जाँदा कम्पनीको ब्याज आम्दानी भने प्रभावित भएको छ। विवरणअनुसार ब्याज आम्दानी गत वर्षको तुलनामा रु. ५७ करोड ६६ लाख अर्थात् २०.५७ प्रतिशतले घटेको छ।
