संगीता सुवेदी /
गोकर्णेश्वर, काठमाडौं — “मासिक १०० अभियान नेपाल” द्वारा निरन्तर रूपमा सञ्चालन हुँदै आएको जेष्ठ नागरिक भेटघाट तथा सम्मान कार्यक्रमको ७१औँ शृङ्खला उत्साहपूर्ण वातावरणमा सम्पन्न भएको छ।यसपटकको कार्यक्रममा चारै पुस्ताको सक्रिय सहभागिता प्रमुख आकर्षण बनेको थियो। हजुरबा–हजुरआमादेखि बा–आमा, युवा पुस्ता हुँदै नातिनातिनासम्म एउटै मञ्चमा प्रस्तुत हरेक योगदानले कार्यक्रमलाई झन् जीवन्त, भावनात्मक र प्रेरणादायी बनायो।
समारोहमा हजुरबा–हजुरआमाले आफ्नो अनुभव, संस्कार, स्मृति र आशीर्वाद बाँडे। बा–आमाले जीवनयात्राका सिकाइ र सन्देश प्रस्तुत गरे। युवा पुस्ताले ऊर्जा, सिर्जनशीलता र कौशल पस्किदै वातावरणलाई उत्साहपूर्ण बनाए भने नातिनातिनाले गीत, कविता, नृत्य र विविध प्रतिभा प्रदर्शन गर्दै कार्यक्रमलाई रंगीन बनाएका थिए।
चार पुस्ताको एउटै मञ्चमा अभूतपूर्व उपस्थिति देखिनु भनेको सामाजिक एकता, पारिवारिक समन्वय र पुस्तान्तरणको सुदृढ उदाहरण भएको सहभागीहरूले बताएका छन्। कार्यक्रमले जेष्ठ नागरिकप्रति सम्मान, सद्भाव, माया र कर्तव्यभावना झनै सबल बनाएको अनुभूति सहभागी तथा आतिथ्यताहरूले व्यक्त गरेका छन्।सञ्चालनका क्रममा “मासिक १०० अभियान नेपाल” ले आगामी दिनमा पनि यस्ता सराहनीय र परिवार तथा समाजलाई नजिक पार्ने कार्यक्रमलाई अझ सुदृढ रूपमा निरन्तरता दिने प्रतिबद्धता जनाएको छ।
