२०८२/२४ मंसिर,काठमाडौँ / समाजिक अभियन्ता एवम् पत्रकार सन्तोष प्रसाद तिवारीले वर्तमान जेन–जि सरकारले कम्तीमा तीन वर्ष स्थिरतापूर्वक शासन सञ्चालन गर्नुपर्ने आफ्नो धारणा सार्वजनिक गरेका छन्। उनका अनुसार यस्तो राजनीतिक अवसर बारम्बार नआउने भएकाले सरकारलाई बलियो बनाउन सबै पक्षले सहयोग गर्न आवश्यक छ।
तिवारीका कथनमा, २००७ सालदेखि नै मुलुकले क्रान्ति, आन्दोलन र निर्वाचनको निरन्तर चक्र भोग्दै आएको तर परिणामसहितको परिवर्तन भने सडकमा होइन, सत्तामा आउने नयाँ नेतृत्वसँग मात्र सम्बद्ध भएको छ। उनका अनुसार सामान्य जनताले परिवर्तनको लाभ पाउन नसकेको आरोप पुरानै ढङ्गले दोहोरिँदै आएको छ।
– आन्दोलन र वादका नाममा “अनावश्यक अशान्ति रोक्नुपर्छ”
तिवारीले सरकारविरुद्ध गरिने विभिन्न आन्दोलन, विशेषगरी “पुरानो व्यवस्था, समाप्त भइसकेका तन्त्र वा कुनै वादको समर्थन–विरोधमा हुने प्रदर्शन”लाई निषेध गर्नुपर्ने कुरा जोड दिए। उनका अनुसार यस्ता गतिविधिले स्थिरतामा बाधा पुर्याउने भएकाले सेना र प्रहरीसँग समन्वय गरेर मात्र अघि बढ्नुपर्छ भन्ने उनको तर्क छ।
-“चुनावले कहिल्यै निकास दिंदैन”
हाल देशभर भइरहेका आगामी निर्वाचन सम्बन्धी बहसबारे तिवारी भन्छन्— “चुनाव विकल्प होइन, यसले निकास पनि दिंदैन। नयाँ चुनावबाट फेरि आश गर्नाले जनताले सुख पाउँदैनन्।” उनका अनुसार मुलुकको समस्या समाधान गर्न भन्दा पहिले सरकारलाई दिगो र सक्षम बनाउने वातावरण आवश्यक छ।
– राजनीतिक दलमाथि आरोप
तिवारीले राजनीतिक दलहरूलाई जनतामाझ “भ्रम छरेर उकास्ने काम गरेको” आरोप लगाए। उनका अनुसार बलियो सरकार बनेमा दलका नेताहरूका विभिन्न काण्डहरू उजागर हुने डरले उनीहरू अस्थिरता चाहन्छन्। उनले दल तथा तिनका नेताहरूले विदेशीसँग आर्थिक स्वार्थमा जनताको श्रम बेच्ने, तडकभडक जीवनशैली मिच्युक्त भएर बाँच्ने लगायतका गम्भीर आरोपसमेत लगाए।
– न्यायालय र कर्मचारीतन्त्रमा पनि सुधारको माग
तिवारीले अदालतदेखि कर्मचारीतन्त्रसम्म दलका प्रभावमा रहेको तथा धेरै हदसम्म भ्रष्टाचारले ग्रस्त भएको दाबी गर्दै व्यापक सुधार आवश्यक रहेको बताए। उनले सरकारी स्रोत उपयोग गरेर राजनीति गर्नेहरूलाई कारबाही गरी बर्खास्त गर्नुपर्ने, र विभिन्न नामका दलसम्बद्ध संगठनहरू खारेज गर्नुपर्ने माग पनि राखे।
– “जेन–जि आन्दोलनबाट बनेका मन्त्रीले काम नगरे फेरि सडकबाटै नयाँ नेतृत्व”
तिवारीले अहिलेका मन्त्रीहरूले अपेक्षा पूरा गर्न नसके पुनः सडकबाटै नेतृत्व निर्माण गर्न सकिने उल्लेख गरे। तर उनले हालै बनेको सरकारलाई “स्थिरता, समय र सहकार्य” चाहिने भन्दै तत्कालै अस्थिरता सिर्जना गर्न नहुने धारणा प्रस्तुत गरेका छन्।
सन्ताेष प्रसाद तिवारी लेखक/स्वतन्त्र पत्रकार ।
