१ मङ्सिर ,२०८२ काठमाडौं । नेपाल बैंक लिमिटेडले आफ्नो ८९औँ वार्षिकोत्सव भव्य रूपमा मनाएको छ। वि.सं. १९९५ साल कार्तिक ३० गते स्थापना भएको बैंकले २०८२ कार्तिक ३० गते ८८ वर्ष पूरा गरी ८९औँ वर्षमा प्रवेश गरेको अवसरमा प्रधान कार्यालयमा आयोजित समारोह बैंकका सञ्चालक समिति अध्यक्ष प्रा. डा. डिल्लीराज शर्माको अध्यक्षतामा सम्पन्न भएको हो। नेपालभर २३१ शाखा, २३७ एटिएम र ६१ एक्सटेन्सन काउन्टर मार्फत करिब २७ लाख ग्राहकलाई सेवा दिइरहेको बैंकले पछिल्ला वर्षहरूमा ग्राहक सेवामा तीव्र सुधार गर्दै आधुनिक डिजिटल बैंकिङमा जोड दिएको छ। हाल करिब १० लाख ग्राहक डिजिटल माध्यमबाट सेवा लिइरहेका छन्।
कार्यक्रममा लामो समय बैंक सेवामा योगदान पुर्याउने २४ वर्षे सेवा पुर्याएका ३ जना र २० वर्षे सेवा पुर्याएका ४३ जना कर्मचारीहरूलाई पदक तथा प्रशंसापत्र प्रदान गरिएको थियो। त्यस्तै, चुनौतीपूर्ण अवस्थामा बैंक सुरक्षा मजबुत बनाएर योगदान गर्ने गौरादह र नयाँ बानेश्वर शाखाका सुरक्षकर्मीहरूलाई पनि सम्मान गरियो। प्रादेशिक तथा भौगोलिक आधारमा उत्कृष्ट उपलब्धि हासिल गर्ने १२ शाखालाई पुरस्कार प्रदान गरिएको थियो। समारोहमा अध्यक्ष शर्माले कर्मचारीहरूलाई उच्च मनोबल, इमान्दारिता र जिम्मेवारीका साथ आफ्नो भूमिकामा समर्पित हुन आग्रह गर्दै, बैंक व्यवस्थापनलाई सञ्चालक समितिबाट निरन्तर सहयोग रहने विश्वास दिलाए।
