काठमाडौं । राष्ट्रिय वाणिज्य बैंक लिमिटेडको २०औँ वार्षिक साधारण सभा २०८२ पुस २९ गते मंगलबार काठमाडौंमा सम्पन्न भएको छ । बैंक सञ्चालक समितिका अध्यक्ष देवकुमार ढकालको अध्यक्षतामा सम्पन्न साधारण सभाले आर्थिक वर्ष २०८१/८२ को वार्षिक प्रतिवेदन पारित गर्नुका साथै आर्थिक वर्ष २०८२/८३ का लागि लेखापरीक्षक नियुक्ति लगायतका विभिन्न प्रस्तावहरू अनुमोदन गरेको छ । साधारण सभालाई सम्बोधन गर्दै अध्यक्ष ढकालले बैंकले संस्थागत सुशासनलाई पहिलो प्राथमिकतामा राख्दै व्यवसाय विस्तार गरिरहेको बताउनुभयो । उहाँले समयसापेक्ष सेवा तथा सुविधामा परिमार्जन गर्दै प्रविधिमा आधारित आधुनिक बैंकिङ सेवामार्फत ग्राहकलाई गुणस्तरीय सेवा प्रदान गर्न बैंक निरन्तर क्रियाशील रहेको उल्लेख गर्नुभयो । बैंकिङ क्षेत्रमा बढ्दो प्रतिस्पर्धालाई मध्यनजर गर्दै आन्तरिक नीति, नियम, निर्देशिका तथा कार्यविधिमा समयानुकूल सुधार गर्दै प्रतिस्पर्धी क्षमता अभिवृद्धि गर्ने उद्देश्यका साथ बैंक अघि बढिरहेको उहाँको भनाइ थियो ।
साधारण सभामा बैंकका प्रमुख शेयरधनीहरूका रूपमा नेपाल सरकारअन्तर्गत अर्थ मन्त्रालय, महालेखा नियन्त्रक कार्यालय, कम्पनी रजिस्ट्रार कार्यालय, सार्वजनिक खरिद अनुगमन कार्यालय, उद्योग वाणिज्य तथा आपूर्ति मन्त्रालय, ऊर्जा जलस्रोत तथा सिँचाइ मन्त्रालय, शिक्षा, विज्ञान तथा प्रविधि मन्त्रालयका प्रतिनिधिहरू तथा सर्वसाधारण शेयरधनीहरूको उल्लेखनीय उपस्थिति रहेको थियो । सभामा प्रस्तुत प्रतिवेदनमाथि शेयरधनीहरूले टिप्पणी तथा सुझाव राखेका थिए, जसको जवाफ अध्यक्ष ढकालले दिनुभएको थियो । सभामा सञ्चालक समितिका सदस्यहरू थानप्रसाद पंज्ञानी, स्वतन्त्र सञ्चालक लक्ष्मण घिमिरे, प्रा.डा. रामप्रसाद ज्ञवाली, रोमिला ढकाल उप्रेती, डा. सूर्यबहादुर राना, हरिकुमार सिलवाल, प्रमुख कार्यकारी अधिकृत देवेन्द्ररमण खनाल, नायब प्रमुख कार्यकारी अधिकृतहरू सरस्वती अधिकारी र देवेशप्रसाद लोहनी, उपकार्यकारी अधिकृतहरू पवन रेग्मी, विनयरमण पौडेल, दुर्गाकुमारी कंडेल र रामकुमार थापालगायतको उपस्थिति रहेको थियो । साथै बाह्य लेखापरीक्षक, कानूनी सल्लाहकार, कर्मचारी युनियनका प्रतिनिधि तथा विभागीय प्रमुखहरूको समेत सहभागिता रहेको थियो । साधारण सभाको सञ्चालन कम्पनी सचिव प्रमोद अधिकारीले गर्नुभएको थियो । हाल राष्ट्रिय वाणिज्य बैंकले सातै प्रदेशका ७७ जिल्ला सदरमुकाम सहित दुर्गम क्षेत्रहरूमा समेत ३१२ वटा शाखा कार्यालय, ७१ वटा एक्सटेन्सन काउन्टर, ३२२ वटा एटिएम र ९९ वटा शाखारहित बैंकिङ सेवामार्फत आधुनिक बैंकिङ सुविधा प्रदान गर्दै आइरहेको छ ।
