काठमाडौं । नेपाल बैंक लिमिटेडको ६६औँ वार्षिक साधारण सभा बुधबार नेपाल पुलिस क्लब, काठमाडौंमा सम्पन्न भएको छ। सभामा बैंकका शेयरधनीहरूको उल्लेखनीय उपस्थिति रहेको थियो।
सञ्चालक समितिका अध्यक्ष प्रा.डा. डिल्लीराज शर्माको अध्यक्षतामा सम्पन्न सभाले आर्थिक वर्ष २०८१/८२ को सञ्चालक समितिको वार्षिक प्रतिवेदन, लेखापरीक्षकको प्रतिवेदनसहित २०८२ साल असार मसान्तसम्मको वासलात, नाफा–नोक्सान हिसाब, नगद प्रवाह विवरणलगायत सम्पूर्ण वित्तीय विवरणहरू छलफलपछि पारित गरेको छ।
सभामा अध्यक्ष प्रा.डा. शर्माले बैंकको समग्र वित्तीय अवस्था, हालसम्म हासिल गरिएका उपलब्धि, विद्यमान चुनौती तथा आगामी दिनमा अवलम्बन गरिने रणनीतिबारे शेयरधनीहरूलाई जानकारी गराएका थिए। त्यसैगरी, साधारण सभाले आर्थिक वर्ष २०८२/८३ का लागि लेखापरीक्षकको पारिश्रमिक, सेवा, शर्त तथा सुविधासम्बन्धी प्रस्ताव पारित गरेको छ। साथै, महालेखापरीक्षकको कार्यालयबाट परामर्श प्राप्त भएपछि लेखापरीक्षक नियुक्त गर्ने अधिकार सञ्चालक समितिलाई प्रदान गर्ने प्रस्ताव पनि सर्वसम्मत रूपमा स्वीकृत गरेको छ।
