पेरिस, फ्रान्स । नेपाली जनसम्पर्क समिति फ्रान्सको तेस्रो अधिवेशनले शिवराम भण्डारीको नेतृत्वमा नयाँ कार्यसमिति सर्वसम्मत रूपमा चयन गरेको छ।
अगस्ट २, २०२६ मा पेरिसमा आयोजित अधिवेशन संस्थाको विधानअनुसार निर्वाचन प्रक्रिया पूरा गर्दै सम्पन्न भएको हो। अधिवेशनको उद्घाटन सत्र राष्ट्रिय गान तथा लोकतान्त्रिक आन्दोलनका ज्ञात–अज्ञात सहिद र संस्थापक संरक्षक स्वर्गीय किरणचन्द्र सिंह प्रधानको स्मृतिमा एक मिनेट मौनधारणबाट सुरु गरिएको थियो। केन्द्रीय निर्वाचन प्रतिनिधि युवराज पौडेल प्रमुख अतिथि तथा केन्द्रीय पर्यवेक्षक अङ्कली ओली विशेष अतिथिका रूपमा सहभागी थिए। निर्वाचन संयोजक सुवर्णविक्रम हमालको संयोजनमा निर्वाचन प्रक्रिया निष्पक्ष, पारदर्शी र विधानसम्मत रूपमा सम्पन्न भएको आयोजकले जनाएको छ।
अधिवेशनमा नेपाली कांग्रेस फ्रान्सका पूर्वमहासचिव एवं जनसम्पर्क समितिका पूर्वमहामन्त्री कमलबिक्रम केसी, पूर्वउपाध्यक्ष चेनेभक्त ढुंगाना, वरिष्ठ पत्रकार दीपक चालिसे तथा संस्थापक कोषाध्यक्ष देवीजङ्ग गुरुङलगायतको उपस्थिति थियो।
कार्यक्रममा बोल्दै सहभागी वक्ताहरूले प्रवासमा रहेका नेपालीलाई एकताबद्ध बनाउन जनसम्पर्क समितिको भूमिका महत्वपूर्ण रहेको उल्लेख गर्दै नवनिर्वाचित कार्यसमितिलाई सफल कार्यकालको शुभकामना दिएका थिए। दुई कार्यकाल सफलतापूर्वक नेतृत्व गर्दै जिम्मेवारी हस्तान्तरण गरेका निवर्तमान सभापति सुधीर रानाले आफ्नो अनुभव साझा गर्दै नयाँ नेतृत्वलाई पूर्ण सहयोग गर्ने प्रतिबद्धता व्यक्त गरे।
नवनिर्वाचित सभापति शिवराम भण्डारीले संस्थाको गरिमा अझ उचाइमा पुर्याउँदै फ्रान्सस्थित नेपाली समुदायको हकहित, एकता र लोकतान्त्रिक मूल्य–मान्यताको संरक्षणका लागि आफ्नो टिम सक्रिय रूपमा अघि बढ्ने प्रतिबद्धता जनाए। नयाँ कार्यसमितिको वरिष्ठ उपसभापतिमा कृष्ण गुरुङ चयन भएका छन्। उपसभापतिमा विकास केसी र सुजनराज भट्ट तथा महामन्त्रीमा सुशील भण्डारी चयन भएका छन्। सहमहामन्त्रीको जिम्मेवारी विवेक धमला र कोषाध्यक्षको जिम्मेवारी दीपेन्द्र दाहालले पाएका छन्। कार्यसमिति सदस्यमा सचिन सेन, सागर गुरुङ र चिरञ्जीवी सापकोटालगायत निर्वाचित भएका छन्।
