काठमाडौं, वैशाख २८ । होटल व्यवसायी महासंघ नेपालका नवनिर्वाचित अध्यक्ष टीआर भण्डारी (शंकर) ले नीतिगत सुधारका लागि सशक्त आवाज उठाउने बताएका छन् । नवनिर्वाचित पदाधिकारी तथा केन्द्रीय सदस्यहरुलाई प्रमाणपत्र वितरण गर्न हालै काठमाडौंमा आयोजित कार्यक्रममा अध्यक्ष भण्डारीले सबैको सहयोगबाट आफू अध्यक्ष भएको हुनाले सबैको भावनाको कदर गर्ने प्रतिबद्धता जनाए । ‘मलाई अध्यक्ष बनाउन तपाइहरुले जुन सहयोग र समर्थन गर्नुभयो, त्यो मेरो लागि एउटा अवसर पनि हो’ उनले भने ‘हामीमा पनि केही चुनौती छन्, ती चुनौतीलाई नीतिगत र व्यवहारिक रुपमा सुधार गर्दै सहज बनाउनुपर्ने छ ।
उनले नेपालमा पर्यटनको राम्रो सम्भावना रहेको बताए । ‘पर्यटनको सम्भावना भएकाले हामीले पर्यटन विकासमा जोड दिनुपर्छ, जसले गर्दा होटल व्यवसाय पनि चल्छ भनें सरकारलाई पनि हरेक प्रकारले फाइदा हुन्छ’ अध्यक्ष भण्डारीले भने । गत चैत्र अन्तिम साता पोखरामा भएको महाधिवेशनले भण्डारीले सर्वसम्मत रुपमा अध्यक्षमा चयन गरेको थियो । उनी यसअघि महासचिव थिए । कार्यक्रममा वागमती प्रदेशका पर्यटनमन्त्री सुरेश श्रेष्ठ, नेपाल उद्योग वाणिज्य महासंघका नवनिर्वाचित वस्तुगत तर्फका उपाध्यक्ष नरेशलाल श्रेष्ठ, नेपाल पर्यटन बोर्डका कामु सिइओ हिक्मतसिंह ऐरलगायतको उपस्थिति रहेको थियो ।
प्रमुख अतिथि वागमती प्रदेशका पर्यटनमन्त्री श्रेष्ठले पर्यटन व्यवसायीका समस्या समाधान गर्न आफूले आवश्यक कदम चाल्ने आश्वासन दिए । उनले होटल व्यवसायीका सकारात्मक मागलाई सुनेर आवश्यक अनुसार सहजीकरण गर्ने पनि बताए । नेपाल उद्योग वाणिज्य महासंघका उपाध्यक्ष नरेशलाल श्रेष्ठले होटल व्यवसायीलाई उद्योगसरहको सुविधा उपलब्ध गराउन सरकारसँग माग गरे । उनले अनावश्यक झन्झट हटाइदिन पनि सरकारसँग आग्रह गरे । कार्यक्रममा पर्यटन बोर्डका कामु सिइओ ऐरले महासंघसँगको सहकार्यमा काम गर्न पर्यटन बोर्ड तयार रहेको बताए । कार्यक्रममा महासंघका प्रदेश एवं जिल्लाका अध्यक्षहरु र अन्य वक्ताले पर्यटन प्रवर्द्धनमा जोड दिएका थिए ।
