१९ चैत,काठमाडौं / राजन थापा । उपत्यका विकास प्राधिकरणले अवैध रुपमा निर्माण भएका संरचनामा लगानी नगर्नका लागि बैक तथा वित्तीय संस्थाहरुलाई परिपत्र गर्न नेपाल राष्ट्र बैंकलाई पत्र पठाएको छ । प्राधिकरणको अनुमति बिना काठमाडौ, भक्तपुर र ललितपुर जिल्लामा निर्माण गरिएको संरचनामा लगानी नगर्न परिपत्र गर्न आग्रह गरेको हो । काठमाडौं उपत्यका भित्रका जिल्लामा घडेरी विकास गर्न तथा घर निर्माण गर्दा काठमाडौं उपत्यका विकास प्राधिकरण ऐन, २०४५ काठमाडौमा उपत्यका विकास नियमावली, २०६८ वस्ती विकास सहरी योजना तथा भवन निर्माण सम्बन्धी आधारभूत मापदण्ड २०७२ का अनुसार प्राधिकरणसँग योजना अनुमति लिनुपर्नेछ । तर, यी जिल्लाहरुमा प्राधिकरणको स्वीकृति नलिई मापदण्ड विपरित बनेका संरचना तथा जग्गाहरु विक्री भै रहेको प्राधिकरणले जनाएको छ । नियम विपरित अनुमति नलिई बनाइएका यस्ता संरचना लगानी नगर्न प्राधिकरणले पत्र पठाएको हो ।
प्राधिकरणका अनुसार यस्ता संरचनाहरुमा बैक, लघुवित्त, तथा सहकारीको समेत लगानी भएका पाइएको जनाएको छ । उपत्यका भित्र नियम विपरित अवैध प्लाटिङ्ग, हाउजिङ्ग, संयुक्त आवास, हस्पिटल , होटल, स्कुलहरु, मनोरञ्जनल स्थल लगायतका संरचनाहरु बनेका छन् । यस्ता खालका संरचना निर्माण गर्दा पाँच प्रतिशत खुल्ला क्षेत्र, कम्तिमा ६ मिटर बाटो हुनुपर्नेछ । त्यस्तै, काठमाडौ जिल्ला भित्रका सरकारी, सार्वजनिक, पर्ति र खुल्ला क्षेत्र कुनै व्यक्ति वा संस्थाले कानून विपरित प्रयोग गरेको थाहा पाएका जानकारी दिन समेत प्राधिकरणले आग्रह गरेको छ ।
